ذكرى جميله

فتنة بدو · #1 08-13-2014, 02:17 AM

اراح اشاركم ذكرى يوم زواجي

ومباركين عِرس الأثنين ليلة ربوع >> وخميس وجمعه وسبت

يوم عرسي كنت أنا العريس >> أي العريس بشحمه ولحمه " محسوبتكم وهي صغيره كانت حاسبه نفسها شنب "
ولزوم أتزبط وأتكشخ للمنحوسه ..!
أروح صالون مليان صابون >> وأجلس ألعب بدال ما أنظف نفسي
وأغطس في حمام بخار ما أشوف الا دخاخين سوداء يقولون إنها طالعه مني >> كنت ألعب بالتراب كثير عشان كذا
ويوم أخلص وأطلع مايشوفون غير غباري " محد قالهم يزيدون بسعر التنظيفات لأني خربت مركزهم "
المهم أضوي بيتنا والا الحريم كلهم بالمشغل مافي غير أنا ...
وألبس لكم هذاك البشت اللي سواده يصطع مثل نور الشمس
وأحلق شعري على 3 , وأزبط السكسوكه وأمشط الشنب وأعطره وأمشطه >> لزوم اتكشخ به قدام العروسه
وأفتح باب غرفتي أبي أطلع غير أنقلب وأصير بنت >> إيه بنت أحد عنده شي
" اللي يسمعكم الحين ماتحلمون باحلام مادري كيف جايه , مثلا تكون مترنبش في بيتكم تطلع تلاقي نفسك بحوش ديرتكم ..!

^ اللي ماحلم احلام مثل تسسذا تراه ماذاق طعم الأحلام الشيطانيه

خل أكمل لكم يوم إني صرت بنت مير أمي تجي وتنقعني في قفاي وتقول وراك توك صاحيه واليوم عرسك ؟
أكيد سهرانه أمس
الله يقلعك عند رجلتسس ونفتك منتس >> ليش يالحبيبه تجرحين مشاعري ليش ؟
أنا بنتش من لحمش ودمش
بس ماش ماينفع السسؤال سعوديين قحط مشاعر مافي غير قنابل تبي والا أصقع راسك , بأربع جدران مع السقف والأرض صارو 8
المهم أتجهز وتسسذا وأنحاش لزواجي قبل الكل الساعه 11 باليل

ألاقي الناس والكل موجود !!
هذي قاعتي ؟؟ >> من برى حسيت إني داخله بيت الوليد بن طلال
ومن جوى حششى كوخ رعب
الله وكيلكم حتى أمي ماعرفتني ..! >> أقصد ماعرفتها
أخواتي تبرأت منهم >> وش أبي فيهم دامي بأروح عند الزين كله
يوم جو أهلي يبون يدخلوني غرفة العرايس وأنا أقول لأ ..
هم يدفون فيني بالقوه وأنا حاطه رجولي ويديني على الباب وأصارخ : مابي ادخل , هذي موب قاعتي .. هذا موب عرسي أنا مو أنا
من أنتم .. من أنتم
أمي تقول أنا أمك لابعث الله لك جدره !!
أختي تقول أنا أختك خوا الدببه .. اللي عشت معك سنه سنه .. أسبوع أسبوع يوم يوم >> بيت بيت دار دار زنقه زنقه
قسسم لو ماشفت ولد أختي الصغير يمشي وحفاظته طالعه من تحت الثوب كان قلت هذول موب أهلي وهذي موب قاعتي وهذا موب عرسي .

سكنهم مساكنهم ناس وأدوام ما أعرفهم ..
تقول أحد قايل لهم زواجي عيد الألوان بالهند يشخطبون في وجيههم ويجون

والا اللبس سلامات يابوي ..!
في عمريكا على غفله والا برنطانيا ؟؟
لو ما شفت السروال والفلينه بالخارج و علامة الجوده والركب السسوداء بالداخل كان قلت ماني بالسعوديه

المهم أتعوذ بالله ويدخلوني غرفتي وأنتظر لحد تجي زفتي !!
يوم يطلعون أهلي من الغرفه مير أفترش الطرحه حقت الفستان وأنسدح عليها آخذ لي غفوه لحدد ماتجي الزفه ...
لكن ماجاني النوم من الهبد اللي أسمع برى ..!
بسم الله هذاك مو طق ورقص أوادم !!
جن شغاله طرب بصحراء قاحله مافيها مخلوق
جدار الغرفه اللي أنا فيها تصدع ..
حسيت زلزال بدرجة 3 ريختر !
و أنام بالركن عشان لو تطيح علينا السما لحد تجي زفتي
وجات الزفه ويرصعون بالباب بقوه ويطفون المكيف وأضطر أقوم !!
و أجهز نفسي وأمسح سعابيلي اللي نزلت وأنا نايمه
وأعدل الشوشه اللي صارت كدش
والمكياج أنعفسس فوق تحت كأن من أخذ راسي و دخله بسطل فحم ثم سطل رماد ثم طحين ملون ثم غطسه بمويه بارده >> بقى بس يحطوني ع النار وأصير شاي مخدر ع الفحم بنكة الطحين

بعدين أوقف للزفه عند باب المسيره قبل ينفتح
" قسسم رجولي تصاقع من الخرعه >> أمي تحسبني أصفق من الفرحه تجي تعطيني طراق يطيح تقييم سنوني البرشلوني
وينفتح الباب وتبدأ الموسيقى , مايمدي أركبه أقوم أدسسه بالمسكه لبعد الزفه ...

##

محمد عبدوه " اللي ما أحِبوه "

أميرة الورد ليه > ليه ..
الورد مفتووووون > مفتون
ليه بحياته يحاول > يحاول
يشبه ألوانك > ألوانك
القاعه قلبت جمهور ومحمد عبده صار ناصر الفراعنه
ألحين أنا أنزف والعالم منطربه تردد
بيني وبينكم العاده العروس تكون مستحيه بسس انا كنت منفجعه من الأُمه اللي قدامي
حششى زواجهم موب زواجي
كاشخين أكثر مني !
لابسين أحسن مني !
طالعين أحلى مني ! >> كيو تسوون تسذا ؟ كيو
بسس مابرَد حرتي غير العامله اللي على الكوشه تمصع بورعان الحريم تمصع
هي كاشخه وجالسه و ولدها سرداحي مرداحي من قدامي
لو أحد حاول يطلع الكوششه تلسعه بالخيزران اللي معها وتجي الحرمه تهابد عشان ولدها يبكي ويخرب برستيجها وتصير علوم وعلوم ..!

^ بهالوقت ترى أنا أحس بالراحه النفسيه >> قلبي طيب من يوم يومي
المهم أنزف وأجلس وما أشوف الورد اللي رشوه علي أخواتي ..
وين راح ؟ >> طلعو العيال مجمعين الورد في علب مويه
سلامات يالحبايب ؟
تلعبون دور العروسه على حساب وردي
جايبته بقروش مهري موب لعب عيال !!
آآآآخ بسس لو ماني خرعانه من كف الوالده كان لحقتهم وأخذت الورد >> عشان نلعب فيه أنا والمعزب بالفندق
بس أستهدي بالله وأجلسس عاقله ...
( ورقص واغاني وما أشوف إلا ناس تنصرع قدامي ..
وناس شابكه الكهرب على 220
وناس ترقص رقصة مدي يدك والحقيها
وناس ترقص بكرشتها
وناس داخله جو بالأغنية وتغني وتأشر على قلبها وعيونها يقال إنها منطربه مع الأغنيه وحافظه كلماتها >> ترى آخرتك يا أختاه مدرِسة صم وبكم باحد مراكز الرعايه
*
طبعاً هم يرقصون و دموعي تصبصب من كثر الضحك
فجأه يحسبون سيل جاهم من مادري وين
وقبل يغرقون في بحر الدموع
تتدارك امي الوضع ولله الحمد وتقول حياكم على العششـــ ................. " ماتكمل كلمتها إلا

وأنطلقت الجياد على بركة الله >> بصوت مذيع القناة الأولى يوم الجمعه الساعه 4 العصر
القاعه قلبت سباق خيول
وبعض الخيول عليها ركاب بعد ..!
الأم تجري وشايله عيالها واحد بحضنها واحد بيدها و واحد شوي ويشق فستانها والأخير الناس تمشي من عليه !!
تقول داخلين حرب

طبعاً والناس تتعشى
يدق المحروس يبي ياخذني
وأتقربط بأمي مثل الورع الصغير وأتبكبك وأحب راسها وشكرا عشانك ربيتي وكبرتيني وزوجتيني وأمي حبيبة قلبي تبكي معي وتودعني !!
يوم اغطي وجهي أمسسح دموع التماسيح وتنشق ضحكتي تقول إعلان معجون اسنان

^ ما أصدق أفتك من بيت اهلي !
مجنونه أبكي عليهم " خل أروح عند فارس احلامي اللي مهما طلعت طلعت بخيالاتي فوق !
مردي ألاقيه مثل ............. >> إذا شفته قلت لكم مثل وش

وأركب السسياره وريحة العطر تصرع >> يحسب إنه يبي يدس ريحته الخايسسه عني
ماش يالحبيب ريحتك كانت نفس ريحتي قبل الزواج !!
مشكلتكم ماتتزبوطن لعروساتكم مثل ما نحنا نتزبط لعرساننا

تحرك السسياره و نوصل فندق 4 نجوم .. > ولمن دخلناه صار فندق 5 نجوم
وشبيب يقول يا رقيه أول ماتفتحين الباب مسوي لك فاجعه يحبها قلبك
" أنا رقيه وهو شبيب "
وأبتسسم من الخجل وتبان أسناني كأنها التضاريس الصحراويه في مادة الجغرافيا الصف الثاني متوسط "
ويتخرفن الرجال وتجيه سكته قلبيه من الخرعه و أدخله الغرفه
ويوم أفتح الباب تنكب علي مويه تقول من الجنوب القطبي مو من الثلاجه ..!
وأصحى من النوم على صوت أمي تقول قومي قامت عليك القيامه
اليوم زواجك وأنتي بعدك نايمه ماصحيتي ؟ أكيد سهرانه أمسس ....
أقوم أنا أكمل كلمتها وكأني مغطوسه بالمسبح حق إستراحة جيرننا : ! الله يقلعني عند زوجي وتفتكين مني ., صح ؟
أمي تقول وش دراك إني بأقول كذا ؟؟

* ماخلصت هرج .,’ لحد يرد لا أمصع راسه من بطنه *

شاركونا ذكرى جميله بحياتكم